Primeiru Ministru vizita Centro Nacional de Reabilitação.

11-05-2015 15:22

Primeiru-Ministru vizita Centro Nacional de Reabilitação

 

Primeiru-Ministru Rui Maria de Araújo halo vizita tiha, iha loron 11, fulan Maiu liu ba Centro Nacional de Reabilitação atu koñese instalasaun sira husi sentru referénsia iha Timor-Leste.

Vizita ne´e iha prezensa primeiru-ministru, ministru ba Planeamenu no Investimentu Estratéjiku, Xanana Gusmão no ministra Solidariedade Sosiál, Isabel Amaral Guterres ne´ebé iha biban koñese servisu reabilirasaun sira oin-seluk, ne´ebé loron-loron tékniku sira presta iha sentru, hanesan servisu ba fizioterapia, terapia okupasionál, terapia koalia, ofisina ba kadeira roda no servisu ba ortoprotezia.

Alende ne´e, primeiru-ministru iha biban atu koñese programa naran “Reabilitasaun ho Baze iha Komunidade (RBK) no mós instalasaun sira seluk, inklui dormitóriu. Iha fatin ida ne´e, primeiru-ministru biban koalia ho utente, labarik no adultu balun ne´ebé uza husi fatin ida ne´e.

Primeiru-ministru hateten katak governu determina tiha ona orsamentu ba CNR atu bele implementa ninia planu no sira-nia programa, liuliu, atendimentu ba nesesidade husi ema ho defisiénsia. Primeiru-ministru dehan katak dezafiu ba hadi´a instalasaun sira husi CNR no kapasitasaun rekursu umanu sira-nian mak importante tebetebes, atu halo atendimentu nesesidade ba ema ho defisiénsa sira hotu.

Ikus mai, primeiru-ministru fó elojiu kona ba servisu ne´ebé dezenvolve husi diresaun CNR nian.